Përfaqësuesja e Kosovës në Këshillin e Sigurimit të OKB-së, ministrja e Jashtme, Donika Gërvalla i ka quajtur gënjeshtra të çmendura pretendimet e homologut të saj serb, Marko Gjuriq, se qytetarët serb në veri nuk kanë qasje në shëndetësi.

Madje, ajo ka kërkuar nga të pranishmit në sallë që të mos e besojnë deklaratën e Gjuriqit në KS të OKB-së, shkruan Arbresh.info.

“Çfarë dëgjuam këtu sot janë aq shumë gënjeshtra sa që është absolutisht e pamundur ta demantojmë këtu në një kohë kaq të shkurtër. Shumica prej jush keni ambasada në Kosovë që ju konfirmojnë se asnjë nga deklaratat e Gjuriq nuk janë të vërteta. Të mos e besojmë asnjë gënjeshtër të tillë të çmendur që qytetarët e Kosovës nuk paskan qasje në shëndetësi, llogari bankare apo shërbime lokale. Realiteti është i qartë. Tani pasi vendosëm sundimin e ligjit në veri, tani ata fillojnë të qajnë e të pretendojnë diskriminim”, ka thënë Gërvalla.

Gërvalla ka shfaqur para të pranishmëve një pamflet me një deklaratë të presidentit serb, Aleksandër Vuçiq, i cili ka thënë se Kosova ka qenë pjesë e Serbisë.

“Ja këto deklarata janë krejt të pavend, sepse Kosova na qenka pjesë e Serbisë kur nuk është”, tha Gërvalla.
Po ashtu, ajo e bëri të qartë se në veri është rikthyer normaliteti.

“Kemi krijuar diçka të re diçka të çmuar nga qytetarët e veriut e kjo është normaliteti, lufta ndaj krimit, sundimi i ligjit në vend të sundimit të bandave kriminale të sponsorizuara nga Beogradi, shërbime normale komunale, kemi krijuar atë që vendet e juaja demokratike me përvojë i ofrojnë qytetarëve që një kohë të gjatë”, u shpreh ministrja Gërvalla.

Lexo edhe:

Gërvalla në OKB: Nuk ekziston vend në botë me emrin “Kosova dhe Metohia” – emri i vërtet i vendit është Republika e Kosovës